MANILA, Philippines – Makararanas ng maulap na papawirin at mga pag-ulan ang mga lalawigan sa Northern Luzon dahil sa shear line at Northeast Monsoon (Amihan), ayon sa forecast ng PAGASA Sabado ng umaga.
Ang Apayao, Kalinga, Cagayan, Isabela, Quirino, at Nueva Vizcaya ay makararanas ng maulap na papawirin na may kalat-kalat na pag-ulan at pulu-pulong pagkidlat-pagkulog dahil sa shear line, habang ang Amihan ay makakaapekto sa Ilocos Region, Batanes, at nalalabing bahagi ng Cordillera Administrative Region.
Ang Intertropical Convergence Zone (ITCZ) ay mananaig sa Mindanao at Palawan.
Ang Metro Manila at ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa easterlies.
Ang hangin ay magiging katamtaman hanggang sa malakas at ang mga baybaying dagat ay magiging katamtaman hanggang sa maalon sa Northern Luzon. Para sa natitirang bahagi ng Luzon at Visayas, magiging katamtaman ang hangin kasama ang katamtamang pag-alon sa baybayin.
Mahina hanggang sa katamtamang hangin at banayad hanggang sa katamtamang baybayin ng tubig ang inaasahan sa Mindanao. RNT/MND
