MANILA, Philippines – Naniniwala si PCG Spokesperson for the West Philippine Sea Commodore Jay Tarriela na nagkakaroon ng signal jamming sa mga barko ng Pilipinas habang sila ay papalapit sa Bajo de Masinloc sa West Philippine Sea.
Ayon kay Tarriela, ang Starlink connection ng barko ng Bureau of Fisheries and Aquatic Resources at maging ang PCG vessel MRRV 4409 ay nawawalan ng siganal.
Sinabi pa ni Tarriela sa virtual briefing na naniniwala siyang ginagawa ng People’s Republic of China ang signal jamming dahil sa tuwing lalapit sila sa loob ng 24 nautical miles o sa Bajo de Masinloc ay doon nawawala ang Starlink signal na maaari umanong makapagpaantala sa paghahatid ng impormasyon at makokompromiso ang komunikasyon sa pagitan ng barko at monitoring units.
Ito rin aniya ang kauna-unahang insidente ng signal jamming na nangyari.
Nangyari ang insidente habang nagsasagawa sila ng maritime domain awareness (MDA) operation matapos mamonitor ang maraming bangkang pangisdaan ng mga Pilipino sa lugar.
Idineploy ng PCG ang isang Coast Guard Islands aircraft, BRP Cabra at BRP Gabriela Silang habang apat na barko naman ang ipinadala ng BFAR upang magbigay ng safety assistance fuel subsidies at yelo sa mga mangingisdang Pilipino.
Humigit-kumulang 35 bangkang pangisdaan ang nakita sa lugar.
Sa parehong misyon, namonitor ng PCG ang tatlong China Coast Guard vessels na nasa layong 33.6 nautical miles mula sa Bajo de Masinloc at isang People’s Liberation Army Navy warship na may bow number 554 na nasa layong 50 nautical miles mula sa baybayin ng Zambales.
Sinabi ni Tarriela na nagpapatupad ang PCG ng mga kinakailangang contingency plans kung magpapatuloy ang signal interference, ngunit tumanggi siyang magbigay ng detalye tungkol sa mga operasyong ito. Jocelyn Tabangcura-Domenden
