Siksikang LRT-1 PITX station reresolbahin ng DOTR

MANILA, Philippines – Magpapatupad ang Department of Transportation (DOTr) ng agarang hakbang para maibsan ang mahahabang pila at siksikan sa LRT-1 PITX Station.

Ininspeksyon ni DOTr Secretary Vince Dizon ang istasyon nitong Lunes, Nobyembre 9, matapos ang mga reklamo ng mga commuter tungkol sa matinding pagsisikip at palaging mahabang pila.

Ayon sa DOTr, nasa iisang lugar lang ngayon ang entrance, exit, at ticket-selling areas — kaya nagkukumpulan ang mga pasahero.

Umaabot sa humigit-kumulang 27,000 pasahero araw-araw ang dumadaan sa istasyon, na pinakamabigat ang volume mula alas-6 ng umaga hanggang alas-8 ng umaga.

Bilang agarang solusyon, ililipat ang mga pasahero sa ticket booths sa ground floor ng istasyon.

Maglalagay din ng karagdagang signages para gabayan ang mga pasahero.

Bukod dito magdadagdag ng ticket booths sa labas ng entrance ng istasyon, sa loob ng mall, bago mag-Pasko gayundin sa mga entry gates para mapabilis ang dalos ng pasahero.

Binuksan na rin ang isang pedestrian crossing para direktang makapasok ang mga commuter sa istasyon nang hindi na kailangang dumaan sa mall.

Para sa pangmatagalang solusyon, planong simulan sa susunod na taon ang konstruksyon ng pedestrian walkway na magdudugtong sa LRT-1 station at PITX.

Samantala, mag-aalok ang DOTr ng libreng sakay sa LRT-1 sa Nobyembre 9, 11, at 13, mula alas-7 ng umaga hanggang alas-9 ng umaga at alas-5 ng hapon hanggang alas-7 ng gabi kaugnay ng mga aktibidad ng ASEAN sa mga nasabing petsa. Jocelyn Tabangcura-Domenden