MANILA, Philippines – Bago simulan ang paglilitis kay Vice President Sara Duterte ngayong Lunes, Nobyembre 9, nagbigay ng pahayag si Presiding Officer Sen. Francis “Chiz” Escudero upang i-update ang mga senator-judge, ang magkabilang panig, at ang publiko sa mga nangyari habang naka-recess ang impeachment court mula Oktubre 13, 2026.
1. Mananatili ang Rule XVIII sa lahat ng Articles
Matapos bawiin ng Prosecution ang Articles I, II, at IV, nagpasya ang Chair na hindi na dapat umiral ang sub judice principle sa ilalim ng Rule XVIII sa mga binawing articles.
Ngunit tumutol ang kampo ng Respondent sa pamamagitan ni Atty. Sison, at naghain si Senator-Judge Pangilinan ng motion for reconsideration o apela sa ruling.
Sa Manifestation ng Respondent noong Nobyembre 4, 2026 na hindi niya wini-waive ang Rule XVIII, at sa apela ni Sen. Pangilinan, naglabas ang Korte ng Order noong Nobyembre 5, 2026 na nagsasaad na:
Mananatili at patuloy na iiral ang sub judice principle sa ilalim ng Rule XVIII sa lahat ng articles of impeachment — binawi man o nakabinbin pa.
Muli ring pinagtibay ang August 26, 2026 Ruling na nagbabawal sa lahat ng covered persons na maglabas ng mga pampublikong pahayag o komento na lumalabag sa Rule XVIII.
2. Prosecution, itinuturing nang nagpahinga na sa Article II
Inihain ng Prosecution ang Formal Offer of Documentary Evidence noong Oktubre 20, 2026, at naghain naman ng Comment ang Respondent noong Oktubre 30, 2026.
Sa Order noong Nobyembre 5, 2026, niresolba ng Korte ang Formal Offer. Dahil dito, itinuturing nang nagpahinga na (rested) ang Prosecution sa paglalahad ng ebidensya nito sa Article II.
3. Mga testigo ng depensa
Natanggap din ng Korte ang mga Manifestation ng Respondent noong Nobyembre 4 at 5, 2026.
Sa Nobyembre 4 Manifestation, naglista ito ng 24 na testigo para sa Nobyembre 9 hanggang 13, 2026 at humiling ng subpoena para sa kanila. Sa Nobyembre 5 Manifestation, binawi nito si Dean Ralph A. Sarmiento bilang testigo at hiniling na bawiin ang subpoena para sa kanya.
Nilinaw ng Korte na walang subpoena na naisyu kay Dean Sarmiento, kaya hindi na kailangan ang pagbawi.
4. Unang testigo, hindi makadadalo; ni-reschedule sa Nobyembre 10
Sa Manifestation noong Nobyembre 6, 2026, ipinaalam ng Respondent na ang una nitong testigo na si Atty. Suzette Balucanag-Punay ay sasailalim sa Magnetic Resonance Imaging (MRI) examination sa Nobyembre 9, 2026 at hindi makadadalo sa nakatakdang petsa.
Hiniling nito na i-reset sa Nobyembre 10 ang presentasyon ni Punay at magpatuloy sa mga susunod na testigo.
Nagkomento naman ang Prosecution noong Nobyembre 6, 2026 sa Manifestation na ito.
5. Pinakabagong listahan ng mga testigo
Natanggap din ng Korte ang Manifestation ng Respondent noong Nobyembre 7, 2026 na naglalaman ng mga pangalan ng mga testigong ihaharap mula Nobyembre 9 hanggang 13 at ang layunin ng kani-kanilang testimonya.
Dahil dito, nagpasya ang Korte na:
Pagbigyan ang kahilingan na makapag-testigo si Suzette Punay sa Nobyembre 10;
I-note ang Comment ng Prosecution noong Nobyembre 6 at ang Manifestation;
I-note ang Manifestation noong Nobyembre 7, at mag-isyu ng subpoenas ad testificandum at duces tecum kina Atty. Anel S. Antero, Mr. Chadrin Parian, at Vimar M. Barcellano, na nakatakdang iharap mula Nobyembre 9 hanggang 13.
6. Klasipikasyon ng mga exhibit
Noong Nobyembre 6, 2026, naglabas din ang Presiding Officer ng order na namamahala sa klasipikasyon ng mga exhibit na kalakip ng Formal Offer of Evidence ng Prosecution, at sa paraan at saklaw ng pag-access dito. Nabigyan na ng kopya ang mga partido at mga senator-judge. Ernie Reyes
