NAGBIGAY ng suporta sa siyentipikong pagtitipon ang mga National Scientist na sina Dr. Dolores Ramirez, Dr. Lourdes Cruz, Dr. Carmencita Padilla, Dr. Ernesto Domingo, Dr. Raul Fabella at Dr. Emil Javier.
sa mga naging sentro ng unang araw ng siyentipikong pagtitipon ang plenary lecture ukol sa pagsasanib ng agham at negosyo tungo sa paglikha ng yaman at hanapbuhay sa mga komunidad, inobasyon sa agrikultura, at bioscience engineering. Naging mga tagapagsalita sina academicians Cleofas Cervancia at Homer Pantua ng Biological Sciences Division ng NAST Philippines, Dr. Deoflorence Onda ng UP Diliman – The Marine Science Institute, Jovy Hernandez ng Metro Pacific Agro Ventures, Gonzalo Serafica ng Engineering Sciences and Technology Division, NAST Philippines, Danilo Manayaga ng Secure International Corporation, Philip Cruz ng Herbanext Laboratories, Inc., Jan Vincent Sollesta ng GallenX, at Dr. Romulo De Castro ng University of San Agustin.
Bago ang mas malaking siyentipikong pagpupulong ay nagkaroon muna ng regional scientific meetings na isinagawa sa General Santos city noong March 26 – 27, 2025 para sa Mindanao, sa Iloilo city mula April 29 hanggang 30, 2025 para sa Visayas, at sa Luzon ay sa Cavite noong May 20 hanggang 21, 2025.
Inaasahang magpapatuloy ang diskurso sa mga susunod na araw ng siyentipikong pagpupulong, na pagtutuunan ng pansin ang mga oportunidad sa bioscience para sa green economy, health innovation, at digital transformation.
Binibigyang-pugay rin ang mga natatanging siyentipiko sa pamamagitan ng NAST Talent Search for Young Scientists at NAST Outstanding Scientific Papers Awards, na layuning kilalanin at itanghal ang mga bagong lider sa larangan ng agham.
Gaganapin din ang seremonya para sa pormal na pagtanggap sa tatlong bagong magiging bahagi ng NAST na sina academicians Dr. Wilfredo Roehl Licuanan, Dr. Leocadios Sebastian, at Dr. Charles Yu.
Ilulunsad din ang pagsisimula ng 50th anniversary ng NAST na iinog sa temang “Science-based, Technology supported enterprises.”
Sa kabuuan, ang 47th ASM na pinangunahan nina Dr. Windell Rivera bilang chairperson ng steering committee at NAST Philippines Executive Director Luningning Samarita-Domingo, ay nagsisilbing mahalagang plataporma upang pag-ugnayin ang agham at industriya, tungo sa mas masagana, inklusibo, at maka-kalikasang kinabukasan para sa sambayanang Filipino.
Ang NAST PHL ang pinaka-prestihiyosong akademya ng agham at teknolohiya sa Pilipinas na nagbibigay pagkilala sa mga siyentipiko, nagbibigay payo sa pamahalaan, at nagtataguyod ng kultura ng agham sa bansa.
Naitatag ito noong 1976 sa bisa ng Presidential Decree No. 1003-A sa ilalim ng administrasyon ni dating Pangulong Ferdinand Marcos, Sr., para kilalanin ang natatanging mga siyentipiko at teknolohista ng bansa at bumuo ng isang akademya na naglalayong maglingkod bilang reserba ng mga dalubhasa sa agham at teknolohiya.
Opisyal na naging advisory body ito ng Pangulo at ng Gabinete sa usaping agham at teknolohiya noong 1982 sa bisa ng Executive Order No. 818.
Binubuo ito ng mga academician (resident Filipino scientists) at corresponding members (non- resident Filipino scientists) na pinili ayon sa peer recognition. Maaari ring magtalaga ng honorary members para sa mga kilalang internasyonal na siyentipiko na may kontribusyon sa agham ng bansa.
