BUGALLON, Pangasinan – Isang Sangguniang Kabataan chairman ang binaril at nasugatan sa Barangay Salomague Norte dito noong Sabado, Agosto 17.
Kinilala ng pulisya ang biktima na si Efren Cacdac dela Cruz, 23, residente ng Barangay Salomague Norte.
Ayon sa imbestigasyon, nagmamaneho ng motorsiklo si Dela Cruz pauwi nang pagbabarilin siya ng isang lalaking sakay ng bisikleta na nagtatago sa madilim na bahagi ng highway ng ilang beses.
Nagtamo ng mga tama ng bala ang biktima at dinala ng mga opisyal ng barangay sa ospital.
Narekober sa pinangyarihan ng krimen ang walong basyo ng bala ng 9mm caliber.
Tumakas ang suspek na nakasuot ng itim na jacket at itim na pantalon patungo sa bayan ng Aguilar, Pangasinan. RNT
