Solon pinadidiskwalipika ng 2 tserman sa Comelec sa sinasabing vote buying

Dalawang barangay captain mula sa bayan ng Makato, Aklan ang naghain ng petisyon sa Commission on Elections (Comelec) para sa diskwalipikasyon ni Aklan 2nd District Representative Teodorico “Nonong” Haresco, Jr., dahil umano sa insidente ng pamimili ng boto.

Sa petisyon nina Henry Olid ng Barangay Tibiawan at Shirly Lagradante ng Barangay Poblacion, iginiit nilang personal nilang nasaksihan ang umano’y pamamahagi ng pera ng mga kaanak at kawani ni Haresco sa Barangay Tibiawan, kapalit umano ng suporta sa kandidatura ng kongresista.

Tinukoy sa reklamo ang staff ni Haresco na si Shiela Puod, ang asawa nitong si Barangay Kagawad Ronilo Puod, at dalawang manggagawa mula sa Department of Social Welfare and Development (DSWD) Region VI na sina Rhea Latumbo at Pinky Bunda na umano’y naroroon din sa naturang aktibidad.

Ayon sa mga nagreklamo, nakatanggap umano sila ng impormasyon mula sa isang residente na may pamimigay ng pera sa bahay nina Puod. Agad silang nagtungo sa lugar upang beripikahin ang ulat. Pagdating nila, nakita umano nila si Shiela Puod na nakaupo sa terasa ng kanyang bahay, kung saan may nakalatag na mga bungkos ng ₱1,000 bills, ilang may kalakip na pangalan at kopya ng voter’s ID.

“Kasama ni Shiela ang ilang indibidwal na tila naghihintay ng kanilang tawag,” saad pa sa petisyon.

Dahil dito, pinayuhan umano sila ng mga pulis na iulat ang insidente, at kalauna’y naglabas ng sertipikasyon ang Philippine National Police (PNP)-Makato na kinikilala ang nasabing insidente.

Kalakip ng reklamo ang mga larawan, video, at sinumpaang salaysay mula sa tatlong iba pang testigo. Sa kanilang pahayag, tig-₱2,000 umano ang natanggap ng mga benepisyaryo bilang kapalit ng pagsuporta kay Haresco. RNT