NAKAPAGBIGAY ang SSS o Social Security System ng mahigit Php 1.15 bilyon na halaga ng calamity loan assistance sa halos 70,000 miyembrong naapektuhan ng sunod-sunod na bagyo noong taong 2024.
Ayon kay Carlo Villacorta, SSS acting head para sa Public Affairs and Special Events Division, noong nakaraang Nobyembre 2024 ay nag-alok ang SSS ng calamity loan para sa mga kwalipikadong miyembro na nasa mga lugar na sinalanta ng mga tropical cyclones na sina Kristine, Marce, Nika, Ofel, at Pepito.
“Ang sunod-sunod na matitinding kalamidad ay lubos na nakaapekto sa pinansyal na kalagayan ng ating mga miyembro. Bilang tugon, marami ang agad na nag-avail ng aming calamity loan assistance upang palitan o kumpunihin ang kanilang mga nasirang ari-arian. Umaasa kami na ang mga pribilehiyong pautang na ibinibigay ng SSS ay makatutulong sa kanilang ganap na pagbangon,” ani Villacorta.
Ipinaliwanag niya na ang calamity loan ay ibinibigay sa mga miyembrong naninirahan o nakatira sa mga lugar na idineklarang nasa ilalim ng state of calamity ng NDRRMC o National Disaster Risk Reduction and Management Council.
Upang maging kwalipikado para sa calamity loan, kailangang may hindi bababa sa 36 buwang kontribusyon ang miyembro, anim dito ay kailangang nai-post sa loob ng nakaraang 12 buwan bago ang buwan ng paghahain ng aplikasyon para sa loan.
Samantala, ang mga indibidwal na nagbabayad ng kanilang kontribusyon tulad ng self-employed, voluntary, at land-based Overseas Filipino Worker na miyembro ay kailangang may hindi bababa sa anim na posted monthly contributions sa ilalim ng kasalukuyang uri ng membership bago ang buwan ng aplikasyon ng loan upang maging kwalipikado.
Bukod sa mga kinakailangan sa kontribusyon, ang mga aplikanteng miyembro ay dapat:
• Walang anomang final benefit claim tulad ng permanenteng total disability o retirement;
• Walang overdue na SSS Short-Term Member Loans;
• Walang outstanding na restructured loan o calamity loan; at
• May employer-certified loan application online (My.SSS facility), kung employed.
Nagtapos ang pagtanggap ng aplikasyon at mga dokumento noong Disyembre 21, 2024.
