MANILA, Philippines – Naghain ng mga mosyon sa Supreme Court ang Bangsamoro Government upang maibalik ang lalawigan ng Sulu sa sakop ng Bangsamoro region.
Isinumite sa SC ng Bangsamoro Attorney General’s Office (BAGO) ang motion for leave to intervene at admit attached motion for partial reconsideration,
Sa motion for leave to intervene nais ng Bangsamoro Attorney General’s Office na lumahok sa kaso kahit hindi ito orihinal na bahagi ng pagdinig.
Sinabi ni BAGO Officer-in-Charge Atty. Mohammad Al-Amin Julkipli na sa buong panahon na itinagal ng kaso ay hindi naging partido ang Bangsamoro autonomous region.
Magugunita na idineklara kamakailan ng SC na hindi kasama sa BARMM ang lalawigan ng Sulu matapos tutulan ng mga mamamayan doon ang ratipikasyon ng Bangsamoro Organic Law noong 2019.
Hiniling ng Bangsamoro government sa Mataas na Hukuman na irekonsidera nito ang naging desisyun.
Iginiit ni Julkipli na ang nakasaad sa SC decision ay “immediately executory” at hindi “final and executory” kung kaya maari pa ang naturang legal remedy.
Sinabi ni Julkipli na kumpiyansa ngunit maingat pa rin ang BARMM government at ang kanilang mga ligal na hakbang ay dulot ng masidhing kagustuhan na depensahan ang integridad ng kanilang teritoryo.
Ang lalawigan aniya ng Sulu ay mahalaga sa ipinaglalaban ng Bangsamoro.
“It is part and parcel of the Bangsamoro identity with a very important role to play in our continuous struggle for our autonomy and development as one people,” ani Julkipli. Teresa Tavares
