MANILA, Philippines – Patay sa ambush ang isang sundalo at miyembro ng Civilian Armed Forces Geographical Unit (CAFGU) Active Auxiliary sa Barangay Maquiling, Sagay City, Negros Occidental.
Kinilala ni 1st Lt. Fevie Fajardo, civil military operations officer ng Army 79th Infantry Battalion, ang mga nasawi na sina Corporal Robert Dador, assistant detachment commander ng Celestino Villacin CAA patrol base, at CAA member na si Jonhrey Moncatar, 26-anyos.
Ayon kay Fajardo, nakasibilyan ang dalawang biktima at sakay ng motorsiklo patungong palengke mula sa kanilang detachment nang pagbabarilin ng dalawang hindi pa nakikilalang suspek na sakay rin ng motorsiklo.
“They were probably monitored,” ani Fajardo, at idinagdag na posibleng ang sundalo umano ang target ng pag-atake.
Dead on the spot ang dalawang biktima. Hindi naman nakuha ang service firearm at mga personal na gamit ni Dador.
Patuloy pa ang follow-up investigation ng mga awtoridad kaugnay ng insidente.
Nagpaalala rin si Fajardo sa mga sundalo na manatiling mapagmatyag at nagpaabot ng pakikiramay sa pamilya ng mga biktima. Mary Anne Sapico
