Sure win sa pagkaalkalde alok kapalit P30M; 6 arestado

QUEZON CITY — Arestado ang anim na indibidwal noong Mayo 8, 2025, sa isang entrapment operation ng National Bureau of Investigation (NBI) dahil sa umano’y sabwatan upang manipulahin ang automated voting machines kapalit ng halagang P30 milyon para sa panalo ng isang kandidato sa pagka-alkalde sa Iba, Zambales.

Kinilala ang mga naaresto na sina Roland Ucab, Teody Abalos, Joseph Ong, Cherrylyn Adriano, Ralp Edward Salas, at Francis James Mapua.

Ayon sa ulat, kinausap nina Abalos at Adriano si Atty. Genaro Montefalcon, na tumatakbong alkalde, at inalok siya ng tiyak na panalo kapalit ng malaking halaga, gamit umano ang kanilang koneksyon sa Commission on Elections (COMELEC).

Nagpakilalang kamag-anak ng mga dating opisyal ng COMELEC, humingi ang mga suspek ng paunang bayad na P15 milyon. Dahil sa pagdududa, agad itong iniulat ni Atty. Montefalcon sa COMELEC na agad namang nagsumite ng reklamo sa NBI.

Sa isinagawang operasyon sa isang hotel sa Quezon City, nahuli ang mga suspek matapos tanggapin ang marked money mula sa complainant.

Sila ay sinampahan ng mga kasong Estafa (Art. 315), Usurpation of Authority (Art. 177), at paglabag sa Section 28 ng Republic Act No. 9369 (Automated Election System Law). RNT