QUIRINO, Philippines – Inaresto sa Diffun, Quirino ang isang 44-anyos na dating miyembro ng New People’s Army na matagal nang pinaghahanap kaugnay ng ambush ng 14 na sundalo matapos ang mahigit isang dekada ng pagtatago.
Ayon sa pulisya, ang suspek na kilala sa alyas na “Ka Ariel” ay naaresto noong Mayo 5 batay sa warrant of arrest na may petsang Pebrero 4, 2014 para sa kasong multiple murder na walang inirekomendang piyansa.
Siya ay iniuugnay sa ambush noong Hunyo 27, 2000 sa Barangay Linomot, Jones, Isabela, kung saan napatay ang 14 na sundalo, kabilang si Col. Josefino Manayao, dating commanding officer ng 502nd Brigade, habang pauwi mula sa isang medical mission.
Ayon kay Police Col. Paul T. Bometivo, director ng Nueva Vizcaya Police Provincial Office, pinuri niya ang mga operatiba sa matagumpay na pag-aresto at sinabi na ito ay patunay ng patuloy na paghahanap ng hustisya at pagpapanagot sa mga lumabag sa batas.
Kasalukuyang nasa kustodiya ng Bayombong Police Station ang suspek para sa dokumentasyon at pagsasagawa ng mga legal na proseso. RNT/MND
