Taas-singil ng Netflix sa Pinas kasado sa Hunyo

MANILA, Philippines- Nakatakdang magtaas ng singil ang Netflix sa Philippine subscribers simula sa Hunyo, kasunod ng implementasyon ng 12% value-added tax (VAT) sa digital services ng foreign companies.

Sa abiso sa subscribers, sinabi ng Netflix na paiiralin nito ang VAT sa memberships, at sa monthly price na ia-update simula sa June 1, 2025:

• Mobile: P169 per month

• Basic: P279 per month

• Standard: P449 per month (additional P169 per month for every extra member slot)

• Premium: P619 per month (additional P169 per month for every extra member slot, up to two)

Bago ito, ang monthly rates ay P149 para sa mobile plan, P249 para sa basic, P399 para sa standard, at P549 para sa premium, na may karagdagang member slots sa P149.

Kasunod ang abiso ng paglagda ni Pangulong Ferdinand “Bongbong” Marcos Jr. sa Republic Act 12023, nagpapataw ng 12% VAT sa digital services kabilang ang media, music, video, video-on-demand, at advertising. RNT/SA