MANILA, Philippines – Hinamon ni Senador Rodante Marcoleta si Philippine Coast Guard (PCG) spokesperson for the West Philippine Sea Commodore Jay Tarriela, sa isang “friendly debate” bilang tugon sa naging imbitasyon ni Tarriela sa senador na sumama sa maritime domain awareness flight patungo sa Kalayaan Island Group (KIG).
Matatandaan na binatikos ni Marcoleta si Tarriela sa pahayag nito laban sa China.
Ani Marcoleta, dapat na isama sa debate sina retired Supreme Court Senior Associate Justice Antonio Carpio at University of the Philippines Institute of Maritime Affairs and Law of the Sea professor Jay Batongbacal.
“Bago ‘yun, pakisabi niyo kay Commodore Tarriela kasama si Justice [Antonio] Carpio. Sino ba ‘yung professor sa UP? Para sa isang friendly debate bago pa ‘yung pagpunta roon para sa ganoon maayos natin para sa kapakanan ng ating bansa,” sinabi ni Marcoleta.
Bilang tugon, sinabi ni Tarriela na ang diskusyon sa West Philippine Sea ay hindi dapat idinadaan sa debate kundi ito ay inaayos sa pamamagitan ng batas, national interest at patriotic duty.
“I would be happy to arrange a light-hearted discussion on less consequential matters—perhaps food preferences, current fashion trends, or other societal topics—but our nation’s territorial integrity and legal entitlements in the West Philippine Sea are not subjects for public debate,” sagot ng PCG official.
Binalaan naman nito si Marcoleta sa pagkwestyon sa paggigiit ng Pilipinas sa teritoryo sa West Philippine Sea.
“As a Senator of the Republic, Senator Marcoleta is duty-bound to uphold and defend these very rights. By framing them as debatable, he risks undermining the very oath he took to preserve true faith and allegiance to the Republic and to support its Constitution and laws,” ani Tarriela.
Naniniwala rin umano ito na tatanggi sina Carpio, Batongbacal at sinumang Filipino na nakauunawa sa posisyon ng Pilipinas.
Matatandaan na sinabi ni Marcoleta na dapat isuko ng Pilipinas ang Kalayaan Island Group dahil ang ilang features nito ay labas na sa exclusive economic zone ng Pilipinas.
Kalaunan ay ipinagtanggol ng senador ang pahayag nito at sinabing ang kanyang mga kritiko ay “deliberately abbreviating the context” ng kanyang mga pahayag.
Nadismaya naman dito si Tarriela at sinabing hindi maganda sa isang elected official ang nagbabalewala sa posisyon ng Pilipinas sa West Philippine Sea. RNT/JGC
