Tatay arestado sa tangkang paggahasa sa anak sa Tondo

Arestado ang isang 44 anyos na lalaki matapos tangkaing pagsamantalahan ang kanyang anak sa Tondo, Maynila noong Linggo, Setyembre 29.

Ayon sa Manila Police District (MPD), sinabihan umano ng suspek ang biktima na imasahe ang kanyang likod na sinunod naman ng anak.

Gayunman, bigla na lamang hinila ng suspek ang biktima at hinubaran.

Sinabi ng biktima na tinangka siyang gahasain ng kanyang ama ngunit naitulak niya ito saka agad na nagpasaklolo sa opisyal ng Barangay.

Agad namang inaresto ng mga awtoridad ang suspek.

Mahaharap ito sa kasong paglabag sa  Section 5 ng  Republic Act 9262 (Anti-Violence Against Women and their Children Act). (Jocelyn Tabangcura-Domenden)