MANILA, Philippines – Nagbabala ang PAGASA na magdadala ang Tropical Depression Basyang ng malawakang malakas hanggang matinding pag-ulan sa Mindanao, Visayas, at Palawan sa loob ng susunod na tatlong araw, na maaaring magdulot ng pagbaha at landslide.
Inaasahang magla-landfall ang Basyang sa silangang Mindanao sa pagitan ng Huwebes, Pebrero 5, at Biyernes, Pebrero 6.
Pagkatapos nito, tatawid ito sa Visayas at hilagang Palawan bago muling lumabas sa West Philippine Sea.
Ayon sa PAGASA, kikilos ito pa-kanluran sa loob ng 36 oras bago lumihis pa-kanluran-hilagang-kanluran pagsapit ng Huwebes ng gabi.
Batay sa forecast track, tatawid ang bagyo sa hilagang-silangang Mindanao at ilang bahagi ng Central at Western Visayas, lalabas sa Sulu Sea pagsapit ng Sabado ng umaga, Pebrero 7, at tatawid sa hilagang Palawan sa Sabado ng hapon o gabi.
Mula Miyerkules ng tanghali hanggang Huwebes ng tanghali, inaasahang makakaranas ng 50 hanggang 100 mm ng ulan ang Dinagat Islands, Surigao del Norte, Surigao del Sur, at Davao Oriental.
Mula Huwebes ng tanghali hanggang Biyernes ng tanghali, posibleng umabot sa 100 hanggang 200 mm ang ulan sa Southern Leyte, Bohol, Dinagat Islands, Surigao del Norte at Sur, Agusan del Norte at Sur, Camiguin, at Misamis Oriental. Makakaranas din ng katamtaman hanggang malakas na ulan ang Eastern Samar, Samar, Leyte, Cebu, Negros Oriental, Siquijor, Misamis Occidental, Lanao del Norte, Bukidnon, Davao del Norte, Davao de Oro, at Davao Oriental.
Mula Biyernes ng tanghali hanggang Sabado ng tanghali, inaasahan ang malakas hanggang matinding ulan sa Aklan at Antique, habang katamtaman hanggang malakas na ulan naman sa Palawan, Oriental Mindoro, Romblon, Capiz, Iloilo, Guimaras, at Negros Occidental.
Pinayuhan ng PAGASA ang mga residente at lokal na pamahalaan sa mga apektadong lugar na manatiling alerto, lalo na sa mga lugar na madaling bahain at gumuho ang lupa. RNT/MND
