MANILA, Philippines – BINAWI na ng Department of Agriculture (DA) ang temporary ban sa importasyon ng domestic at wild birds at mga kaugnay na produkto mula sa New Zealand.
Sa Memorandum Order No. 62 na nilagdaan ni Secretary Francisco Tiu Laurel Jr., sinabi ng DA na ang pagbawi sa temporary ban ay kagyat na epektibo, kasunod ng naging deklarasyon ng World Organisation for Animal Health na ang lahat ng mga nakaraang HPAI (highly pathogenic avian influenza) cases sa New Zealand ay naresolba na.
Walang bagong outbreaks na naiulat.
“Based on the evaluation of the Department of Agriculture, the risk of contamination from importing live poultry, poultry meat, day-old chicks, eggs and semen is negligible,” ang nakasaad sa kautusan.
Ang lahat ng import transactions mula New Zealand, saklaw ang domestic at wild birds, at maging kanilang produkto at poultry meat, ay maaaring “commence again” kasunod ng pagpapalabas ng kautusan.
Samantala, bago pa ang pagbawi sa import ban sa New Zealand, pinayagan na ng DA na pumasok sa bansa ang mga wild at domestic birds mula Azerbaijan, Kazakhstan, Saudi Arabia, Slovenia at Sweden, at maging ang poultry products mula Kelantan at Sabah sa Malaysia. Kris Jose
