MANILA, Philippines – Inanunsyo ng Philippine Reclamation Authority (PRA) nitong Lunes, Mayo 4, na ang toll collection sa C5 Link Expressway ay hindi itutuloy sa itinakdang petsa dahil sa tumataas na gastusin sa produktong petrolyo at pagdedeklara ng state of national energy emergency.
Sa pahayag, sinabi ng PRA na ang Notice to Start Collection (NTSC) na inisyu ng Toll Regulatory Board (TRB) sa Segment 3B ng Manila-Cavite Toll Expressway (MCTEP) ay magdedepende sa resulta ng deliberasyon ng project committee sa ilalim ng joint venture agreement.
“The timing of the implementation of the NTSC shall depend on the result of the deliberations and agreement of the MCTEP Project Committee,” ayon sa PRA.
Nilinaw ng ahensya na walang ipatutupad na bagong toll fee ngayong Martes, Mayo 5 habang nagpapatuloy ang usapan ng PRA, PEA Tollway Corporation (PEATC), at Cavitex Infrastructure Corporation (CIC).
Idinagdag pa na nagpapatuloy din ang inspeksyon upang masiguro na ang nalalabing “punch list” items ay sumusunod sa Certificate of Substantial Completion, Road Safety Audit, at Site Acceptance Test bago pa magsimulang maningil ng toll.
Magbibigay-daan ito ayon sa PRA, sa mga stakeholder na magkasundo sa nararapat na rollout schedule habang binabawasan ang posibleng mga isyu na makaapekto sa mga motorista. RNT/JGC
