MANILA, Philippines- Nadakip ng mga tauhan ng Warrant and Subpoena Section (WSS) ng Pasay City police ang isang murder suspect na tinaguriang Rank No. 1 sa district level nitong Biyernes ng tanghali, Agosto 30.
Kinilala ni Pasay City police officer-in-charge P/Col. Samuel Pabonita ang nadakip na suspek na si alyas Jayson, 18, residente ng Pasay City.
Base sa report ni Pabonita na isinumite kay Southern Police District director (SPD) P/Brig. Gen. Victor Leon Rosete, inaresto ang suspek sa isinagawang follow-up operation ng mga tauhan ng WSS bandang alas-11:30 ng tanghali sa Leon Guinto, Manila.
Matagumpay na naisakatuparan ang pagdakip sa suspek sa bisa ng warrant of arrest sa ilalim ng Criminal Case No. R-PSY-24-02789-CR na inisyu nitong nakaraang Hunyo 18, 2024 ni Pasay City Regional Trial Court (RTC) Pairing Judge Christian P. Castaneda ng Branch 108 na walang rekomendasyon na piyansa.
Kasalukuyang nasa kustodiya ng WSS ang suspek habang naghihintay ng commitment order ng korte para sa paglipat ng kanyang pagkukulungan sa Pasay City jail. James I. Catapusan
