MANILA, Philippines – INILUNSAD ngayong Huwebes ni Pangulong Ferdinand R. Marcos Jr. ang Technical Education and Skills Development Authority (TESDA) Skills Passport Mobile Application, isang bagong digital tool na ginawang mas madali ang access ng mga Pilipino sa teknikal na edukasyon, pagsasanay, at oportunidad sa trabaho.
Sa paglulungsad ng mobile app, pinagtibay ni Pangulong Marcos na patuloy na palalawakin ng kanyang administrasyon ang mga scholarship at skills training programs, na pinatunayan ng paglaan ng halos PhP20 bilyon sa TESDA ngayong 2026, ang pinakamalaking badyet sa kasaysayan ng ahensya.
” Sa pamamagitan ng TESDA Skills Passport Mobile Application, may all-in-one digital platform na tayo,” inanunsyo ni Pangulong Marcos sa kanyang talumpati sa Makabagong San Juan National Government Center sa San Juan.
” Dito makikita ninyo ang mga mahahalagang impormasyon tungkol sa TESDA trainees, scholarships, employment opportunities, TESDA-accredited training institutions, at TESDA online training courses,” dagdag ng Pangulo.
Sa pamamagitan ng TESDA Skills Passport Mobile App, ang mga gagamit nito ay maaaring magplano ng kanilang pagsasanay, mag-aral online, at mag-apply para sa mga scholarship gamit ang iisang platform.
“Para sa ating TESDA scholars, mayroon kayong sariling digital storage kung saan mapapatunayan ang inyong National Certificate at mga training,” ayon kay Pangulong Marcos, na idinagdag na nagtatampok din ang app ng AI assistant upang tumugon sa mga tanong anumang oras.
Ang app ay nagsisilbi ring job portal na mag-uugnay sa mga TESDA-certified na indibidwal sa mga employer at industry partners sa buong bansa, ayon sa Pangulo.
Tiniyak ni Pangulong Marcos sa publiko na ligtas ang TESDA Skills Passport Mobile App at protektado ang lahat ng data at credential ng mga gagamit ng app.
“Asahan ninyo na kami sa pamahalaan ay hindi titigil sa trabaho upang tulungan na kayo ay guminhawa ang inyong mga buhay,” diin ni Pangulong Marcos.
Bilang isang komprehensibong digital platform, ipinagsama ng TESDA Skills Passport Mobile App ang mga serbisyo sa pag-aaral, sertipikasyon, trabaho, at scholarship.
Ang mga gagamit ng app ay maaaring bumuo ng mga na-verify na digital identities, masubaybayan ang kanilang progreso, maghanap ng mga oportunidad sa trabaho, at madaling ma-access ang suporta ng pamahalaan.
Ang app ay dinisenyo at pamamatnugutan ng TESDA Information and Communication Technology Office. Ang TESDA Skills Passport Mobile App ay maaaring ma-download sa mga Android and iOS devices. Kris Jose
