MANILA, Philippines – Naglabas ang Land Transportation Office (LTO) ng show cause order laban sa isang motorista at may-ari ng Honda motorcycle na viral sa social media dahil sa umano’y reckless driving at iba pang paglabag.
Ayon sa LTO, dapat humarap ang rider at may-ari sa LTO – Intelligence and Investigation Division sa Enero 15, 10 a.m., para magsumite ng verified o sworn explanation.
Posibleng pananagutin ang rider sa reckless driving, hindi paggamit ng signal sa pag-ikot o paghinto, at hindi pagsusuot ng helmet.
Viral ang video na nagpapakita ng rider at back rider na naka-“traffic enforcer” vest ngunit hindi sumusunod sa mga alituntunin sa kalsada.
Preventively suspended ang driver’s license ng rider sa loob ng 90 araw at inutusan siyang isuko ito bago ang hearing.
Nakalagay din sa LTO alarm ang Honda motorcycle para maiwasan ang anumang transaksyon.
Ani LTO chief Markus Lacanilao: “Failure to appear and submit an explanation will mean that the motorcycle rider will be waiving his right to be heard and that the complaint will be resolved based on the LTO’s evidence.” RNT/MND
