Tulfo namigay ng 1K sako ng bigas, bottled water sa Manila LGU

MANILA, Philippines – PERSONAL na tinanggap ni Manila Mayor Isko Moreno Domagoso ang nasa 1,000 sako ng bigas at bottled drinking water na ibinigay ni Senador Erwin Tulfo, sa pakikipagtulungan nina Manila 1st District Congressman Ernix Dionisio at 5th Dist. Cong. Irwin Tieng para sa mga residente ng Maynila partikular na sa mga nasalanta ng malawakang pagbaha dulot ng habagat.

Tiniyak naman ni Domagoso na makararating ang mga nasabing tulong sa mga pinakanangangailangan, lalo na sa mga evacuee na patuloy na binibigyan ng pagkain sa mga evacuation center.

Ayon kay Sen. Tulfo, tinawagan pa umano nito si Yorme upang iparating na magdadala siya ng tulong para sa siyudad.

“Tumawag ka lang Mayor kung kailangan mo pa, kasi I know it would not be enough and may paparating pa tayo na dalawang bagyo Mayor, at nakahanda namang tumulong ang aming opisina,” ani Sen Tulfo.

Pinasalamatan naman ni Domagoso ang mga mambabatas sa ipinaabot na suporta ng mga ito sa gitna ng mga nararanasang pagsubok ng lungsod.

“We are happy and grateful to the Senate, especially to the office of Sen. Erwin Tulfo,” pahayag ni Domagoso. JAY Reyes