MANILA, Philippines – Pinalakas ng lokal na pamahalaan ng General Santos City ang anti-rabies vaccination matapos magpositibo sa rabies ang isang tupa.
Ayon sa ulat, ang tupa sa Barangay Tambler ay kumilos nang kakaiba habang nakatali sa puno at namatay kinabukasan.
Posibleng nahawa ito mula sa isa pang tupa na positibo sa rabies noong Nobyembre.
“The RADDL (Regional Animal Disease Diagnostic Laboratory 12) recorded a positive result for rabies on a sheep for the first time,” ayon kay City Veterinarian Edward Alexander Leyson.
Sinabi ni Leyson na maaaring kinagat ng isang ligaw na aso ang unang tupa na positibo, at lumitaw ang sintomas matapos ang 14-araw na incubation period.
Kumuha ang opisina ng dugo mula sa higit 30 tupa sa pinaghihinalaang farm, na kalaunan ay pinatay.
Naitala ng lungsod ang 25 kaso ng rabies sa hayop, habang iniulat ng Department of Health na may 260 kaso sa tao sa buong bansa mula Enero hanggang Setyembre 20, 2025.
Maaari ring dalhin ng mga paniki, lobo, baka, kabayo, kambing, unggoy, at kalabaw ang virus. RNT
