MANILA, Philippines – Sugatan ang Pilipinang turista matapos na mahagip ng tren sa Taiwan, ayon sa Manila Economic and Cultural Office (MECO).
Nangyari ang insidente sa Shifen Sky Lantern Old Street, isang sikat na lugar na kilala sa mga lokal na pagkain, souvenir shops, at mga riles ng tren.
Ang babae ay naglalakbay mag-isa ngunit sumama sa isang tour sa bahaging iyon ng kanyang biyahe.
Ayon kay MECO chairperson Cheloy Garafil, ang babae ay stable at mulat, ngunit kailangang sumailalim sa operasyon dahil sa kanyang mga sugat.
Naipagbigay-alam na ang kanyang pamilya, at ang MECO ay nakikipag-ugnayan sa kanyang travel agency na sasagot sa kanyang mga gastusing medikal sa pamamagitan ng insurance. RNT
