MANILA, Philippines – Bahagyang lumakas ang Typhoon Queenie (international name: Surigae) habang kumikilos pahilagang-silangan sa karagatan silangan ng Taiwan nitong Linggo, ayon sa PAGASA.
Alas-4 ng madaling araw, namataan ang sentro nito 685 kilometro northeast ng Itbayat, Batanes, at may lakas na 130 km/h at pagbugsong hanggang 160 km/h. Kumikilos ito pahilagang-silangan sa bilis na 15 km/h.
Wala namang nakataas na Tropical Cyclone Wind Signal sa bansa.
Ayon sa PAGASA, inaasahang lalabas si Queenie sa Philippine Area of Responsibility (PAR) pagsapit ng tanghali hanggang hapon ng Linggo at magpapatuloy pahilagang-silangan patungo sa dagat timog ng Japan.
Hindi inaasahang direktang tatama si Queenie sa anumang bahagi ng Pilipinas. Gayunman, maaaring umabot sa 2 metro ang alon sa hilagang baybayin ng Batanes sa susunod na 24 oras.
Pinayuhan ang mga naglalayag na motorbanca at iba pang maliliit na sasakyang pandagat na mag-ingat at, kung maaari, iwasang pumalaot sa ganitong kondisyon. RNT/MDS
