MANILA, Philippines – Sinusuri ng Armed Forces of the Philippines (AFP) ang ulat ng Ukrainian military intelligence na isang Pilipino ang umano’y namatay habang lumalaban para sa puwersa ng Russia sa Ukraine.
Ayon kay AFP spokesperson Col. Francel Margareth Padilla, wala pang kumpirmasyon ang militar tungkol sa ulat at patuloy pa itong bineberipika.
Sa ulat ng Main Directorate of Intelligence ng Ukraine, kinilala ang umano’y Pilipino bilang Jeric Jumadil Undol, ipinanganak noong Marso 5, 1989, at mula sa Metro Manila.
Ayon sa ahensya, nakakuha si Undol ng Russian visa noong Enero 22, 2026, dumating sa Moscow region noong Abril 18, at lumagda ng isang taong kontrata sa Russian army noong Mayo 3. Sumailalim siya sa humigit-kumulang isang linggong pagsasanay bago ipinadala sa frontline sa kalagitnaan ng Mayo.
Sinabi ng Ukrainian intelligence na namatay si Undol sa huling bahagi ng Mayo sa isang opensiba malapit sa Katerynivka sa Donetsk region ng Ukraine.
Inihayag din ng ahensya na dalawa na umanong Pilipino ang napatay habang lumalaban para sa Russia, at isa pa ang nasa pagkakabihag. Gayunman, hindi pa ito nakukumpirma nang hiwalay.
Nauna nang iniulat noong Enero na isa pang Pilipino, na tinukoy lamang bilang “John Patrick,” ang umano’y nasawi rin habang lumalaban para sa Russia.
Patuloy na nagbabala ang pamahalaan ng Pilipinas laban sa pagsali ng mga Pilipino sa mga dayuhang armadong puwersa, kasunod ng mga ulat ng pagrerekrut para sa digmaan ng Russia at Ukraine. RNT/MDS
