MANILA, Philippines – Nakabuo ang mga mananaliksik mula sa UP Manila College of Pharmacy ng herbal antidiabetic tablet, isang abot-kayang alternatibo sa synthetic diabetes medications.
Dahil ang diabetes ay ika-apat na pangunahing sanhi ng kamatayan sa bansa at nakakaapekto sa 4.4 milyong Pilipino, ang tableta ay humaharang sa α-glucosidase enzyme upang pigilan ang mabilis na pagtaas ng asukal sa dugo.
Ayon kay Assistant Professor Raymond Fernando Yu, napakayaman ng Pilipinas sa likas na yaman na may medisinal na katangian ngunit hindi pa ganap na napapakinabangan. Ang tableta ay naglalaman ng flavonoids, alkaloids, at tannins, na kilala sa pagpapababa ng blood sugar levels.
Sa isinagawang pagsusuri, napag-alamang sa 100 parts per million, ang extracts ay nakapagpababa ng α-glucosidase activity ng 50%, patunay ng bisa nito. Nakakuha na rin ang pananaliksik ng utility model mula sa Intellectual Property Office of the Philippines noong 2022, na inaasahang magiging daan sa komersyalisasyon ng produkto.
Binigyang-diin ni Yu ang malaking potensyal ng mga halamang gamot sa Pilipinas sa pagbibigay ng abot-kayang solusyon sa diabetes para sa milyon-milyong Pilipino. RNT
