MANILA, Philippines – Sinabi ni Justice Secretary Jesus Crispin Remulla nitong Huwebes na itinuturing nang “protected witness” si dating DPWH Undersecretary Roberto Bernardo at bibigyan siya ng seguridad.
Nang tanungin kung sakop na siya ng Witness Protection Program, sagot ni Remulla: “[For] evaluation… pero considered a protected witness. We will give him security already.”
Kasama ni Remulla si Bernardo mula sa pagdinig ng Senate Blue Ribbon Committee kaugnay ng maanomalyang flood control projects, kung saan idinawit ni Bernardo sina Sen. Francis “Chiz” Escudero, dating senador Ramon “Bong” Revilla Jr. at Nancy Binay, at Rep. Zaldy Co.
Ayon sa DOJ, susuriin pa ang testimonya ni Bernardo.
Nauna nang sinabi ni Remulla na ang mga kontraktor na sina Curlee at Sarah Disacaya, at mga dating opisyal ng DPWH na sina Henry Alcantara, Brice Hernandez, at Jaypee Mendoza ay protektado na rin, ngunit hindi pa itinuturing na state witnesses. RNT
