MANILA, Philippines – Ipinalutang ni Senador Juan Miguel “Migz” Zubiri nitong Lunes, Hulyo 7 ang posibilidad na maging minorya ng Senadoang apat na beteranong senador sa pagbubukas ng 20th Congress.
Sa pahayag, sinabi ni Zubiri na kinabibilangan ng “veterans bloc o conscience bloc sina Senador Vicente “Tito” Sotto III, Loren Legarda, at Panfilo “Ping” Lacson. Nanawagan silang ibalik si Sotto kapalit ni Senate President Francis “Chiz” Escudero.
“Apat lang kami. Handa na po kami sa pagiging,” ayon kay Zubiri sa press conference.
Aniya, gusto din nilang ampunin si Senador Risa Hontiveros na nagdeklara bilang independent senador sa 20th Congress na magsisimula ang sesyon sa Hulyo 28.
“Alam ninyo, naawa nga ako kay Senator Risa. Naaawa talaga ako sa kanya—kampanya nang kampanya siya para sa mga kandidato, tapos sabi niya gagawa siya ng sarili niyang bloke na independent bloc. Eh ngayon mag-isa na lang siya. I heard na mag-isa na lang siya. I cannot confirm or deny this,” ani Zubiri.
“She’s most welcome to join us. Although we have a divergent, I’d say, position on some issues. Of course she’s more on the left side, we’re more on the conservative side,” dagdag ng senador.
Naunang inihayag ni Hontiveros na kasalukuyan siyang nakikipag-usap kina Senador Bam Aquino at Francis “Kiko” Pangilinan sa kanilang plano sa 20th Congress.
Sinabi pa ni Hontiveros na kabilang sa minority bloc sa 19th Congress kasama si dating Senate Minority Leader Aquilino “Koko” Pimentel III, na magiging mas realistic” siya kung magiging independent senator sa 20th Congress.
Samantala, binati naman ni Zubiri ang nagsasabing mayroon nang 13 senador ang sumusuporta sa reelection ni Escudero bilang Senate presidency, “Edi wow. Congratulations pagka-ganon.”
Nilinaw din ng dating senate president na hindi siya aktibong nangangampanya para sa pagbabago ng liderato ngunit susuportahan niya ang Pagbabalik ni Sotto bilang hepe ng Mataas na Kapulungan.
Naunang nagpahayag ng pagkadismaya si Zubiri sa liderato ni Escudero na pawang isang diktador. Nakipag-usap din umano siya sa ilang tao na mas gugustuhin nila si Sotto o si Lacson na maging senate president.
“It’s more of accommodation. I think many of them were given the best committees that the Senate can offer. Obviously, our selling point with our group is to be able to repair the image of the Senate and therefore we want to make it more transparent, especially dealing with the budget. We want to give the committees to those who are rightfully deserving because of their qualifications, maybe it’s not saleable to the members of this new 20th congress,” paliwanag niya.
Bukas din sila na suportahan ang “ikatlong puwersa” bilang senate president na hindi miyembro ng kanilang bloke.
“We’re open to another third force. Baka may dark horse diyan na gustong tumayo. Why not? We talked about it sa grupo namin. If there’s a dark horse that will come out that’s not necessarily us four, we’re willing to support. Basta ang pangako lang niya ay transparency at integridad ng Senado,” ani Zubiri. Ernie Reyes
