MANILA, Philippines – Suspendido ang voter registration sa Metro Manila mula Nobyembre 16 hanggang 18 kaugnay ng pagdaraos ng ASEAN Summit.
Ayon sa Commission on Elections (Comelec), magpapatupad ng work-from-home arrangement ang mga tanggapan nito sa National Capital Region sa nasabing mga araw.
Kabilang sa pansamantalang magsususpinde ng serbisyo ang Comelec Main Office sa Intramuros, Manila, mga regional office sa NCR at MIMAROPA, at lahat ng Office of the Election Officer sa Metro Manila.
Bukod sa voter registration, hindi rin muna makakakuha ng voter certification ang publiko sa mga nabanggit na tanggapan.
Magpapatuloy naman ang pagtanggap ng mga aplikasyon sa mga tanggapan ng Comelec sa labas ng Metro Manila.
Nagsimula ang siyam na buwang voter registration noong Nobyembre 10 at magtatagal hanggang Hulyo 30, 2027, bilang paghahanda sa May 2028 National and Local Elections. Jocelyn Tabangcura-Domenden
