MANILA, Philippines – Ayon kay University of the Philippines (UP) College of Law Associate Dean Paolo Tamase, hindi kinakailangang personal na humarap si Vice President Sara Duterte sa impeachment court ng Senado para mag-enter ng plea.
Aniya, sa isang interview, ang impeachment ay isang sui generis o natatanging proseso kaya hindi ito kriminal o sibil na kaso.
“Now, kung criminal na kaso ito, importante ‘yung step na iyon. But dahil itong proseso na ito ay sui generis, tinatawag natin katangi-tangi, hindi naman siya criminal, hindi siya sibil, hindi actually kailangan magpakita ni Vice President Duterte at this point,” ayon kay Tamase.
“Pwede siyang magbigay ng plea niya kung guilty or not guilty siya through lawyers niya or through ‘yung counsel niya,” dagdag pa niya.
Gayunman, sinabi niyang mas mainam pa rin kung personal siyang haharap para maipakita sa publiko na wala siyang tinatago.
“Inexpect naman po natin siya magsasabi na not guilty. Ngunit maganda pa rin na marinig ‘yun mismo galing sa kanya… Ay hindi siya above the law at hindi din siya above ng mamamayan,” ani Tamase.
Samantala, sinabi rin niya na sa prinsipyo ay hindi na maaaring pigilan ng Supreme Court ang impeachment trial dahil ito ay eksklusibong kapangyarihan ng Senado. RNT/MND
