MANILA, Philippines- Excited nang umuwi ng Pilipinas si Vice-President Sara Duterte dahil tapos na ang kanyang tungkulin bilang anak ni dating Pangulong Rodrigo Roa Duterte na nakaditine sa Scheveningen Prison sa The Hague, Netherlands dahil sa kinahaharap na crimes against humanity.
“Yes, yes, I am excited to go home…I’ll just book the travel arrangement,” ang sinabi ni VP Sara sa isang panayam.
Sa katunayan aniya ay naihatid na niya ang mga dokumento na kailangan at babalik na siya ng Pilipinas sa oras na ang kanyang travel arrangements ay tapos na.
“Yes, everything’s organized with the lawyers… and there’s already a system for the family with regard to the visiting here in the detention units… so yes… and that the last document that was needed of me, I delivered it this morning to the person inside who asked for it. So yes, my task is done. Well-organized,” aniya pa rin.
Si VP Sara ay nasa The Hague simula pa noong Marso 12, o isang araw matapos na arestuhin ang kanyang ama na si dating Pangulong Duterte, inaresto dahil na rin sa naging kahilingan ng International Criminal Court bilang bahagi ng imbestigasyon nito sa “war on drugs” sa ilalim ng liderato ng dating Pangulo.
Sinabi pa ni VP Sara na uuwi na siya ng Pilipinas kapag ang travel arrangements para sa ibang miyembro ng pamilya ay natapos na rin, at habang naghihintay ay mananatili ang mga ito na malapit sa kanilang ama habang ito ay nasa detensyon. Kris Jose
