MANILA, Philippines – Ayon sa kampo ni Vice President Sara Duterte, nais umano nilang ipatawag bilang testigo sa Senate Impeachment Court si dating Senador Antonio Trillanes IV, dating aide Ramil Madriaga, at mahigit 40 iba pang indibidwal para sa kanyang impeachment trial.
Batay sa umano’y kopya ng pre-trial brief. nakasaad na layunin ng depensa na ipresenta ang maraming dokumento at personalidad bilang mga testigo sa kaso.
Ayon sa dokumento, si Trillanes at Madriaga ay kabilang sa mga high-profile witnesses na nais ipatawag. Nakasaad na si Madriaga ay gagamitin “to disprove the allegations in the Articles of Impeachment, identify documents, and prove such other relevant matters related to the foregoing,” habang si Trillanes ay “to disprove the allegations in the Articles of Impeachment, prove that the allegations in the Articles of Impeachment are mere conclusions of law and fact, identify documents, and establish such other matters related to the foregoing.”
Kasama rin sa listahan ng posibleng testigo ang ilang dating opisyal at ahensya tulad nina dating Executive Secretary Lucas Bersamin, dating Budget Secretary Amenah Pangandaman, Ombudsman Jesus Crispin Remulla, Anti-Money Laundering Council (AMLC) Executive Director Ronel Buenaventura, BIR Commissioner Charlito Mendoza, NBI Director Melvin Matibag, at COA Intelligence and Confidential Fund Audit Office Atty. Gloria Camora.
Si Trillanes, isang matinding kritiko ng mga Duterte, ay naging resource person sa pagdinig ng House committee on justice noong Abril 22. Sa nasabing hearing, lumitaw rin ang usapin ng mga financial transactions matapos kumpirmahin ng Anti-Money Laundering Council ang ilang transaksyon na binanggit sa affidavit ni Trillanes.
Ayon kay AMLC Executive Director Ronel Buenaventura, hindi nila maaaring ibunyag ang detalye ng mga transaksyon, ngunit kinumpirma nila kung may kaparehong halaga at petsa ng mga ito sa kanilang database. Sinabi rin na may natukoy na “covered and suspicious transactions” umano sa vice president at kanyang mga kamag-anak.
Si Madriaga naman ay nagsabi sa supplemental affidavit na inutusan siya umano ni Duterte noong Disyembre 2022 na maghatid ng pera sa iba’t ibang lugar bilang “returning a favor,” at naglaman umano ang mga duffle bag ng tinatayang ₱30 milyon hanggang ₱35 milyon bawat isa, kaugnay ng ₱125 milyong confidential funds noong 2022.
Si Duterte ay na-impeach noong Mayo 11 matapos bumoto ang 257 mambabatas pabor sa House Resolution No. 989, na nagsasama ng mga artikulo ng impeachment kaugnay ng umano’y katiwalian, maling paggamit ng confidential funds, unexplained wealth, bribery, at iba pang mabibigat na paratang. RNT/MND
