MANILA — Kinumpirma ng Department of Interior and Local Government (DILG) na bumisita si Vice President Sara Duterte sa isang jail facility sa Camp Bagong Diwa, Taguig City, ngunit hindi kay Ramil Madriaga kundi kay dating Negros Oriental representative Arnolfo “Arnie” Teves Jr.
Ayon kay DILG Secretary Jonvic Remulla, naganap ang pagbisita noong Oktubre 19 at nakipagkita lamang si Duterte kay Teves, na inakusahan sa pag-utos sa pagpatay kay dating gobernador Roel Degamo noong 2019.
“Pumunta siya roon pero kinausap niya si Arnie Teves. Hindi si Madriaga,” ani Remulla.
Sinabi rin ni Remulla na mayroong records ng pagbisita mula sa warden at wala namang masyadong pinag-usapan kundi ang simpleng kumustahan.
Matatandaang inakusahan ni Madriaga si Duterte ng pagkakaroon ng ugnayan sa kanyang kampanya at umano’y pondo mula sa drug dealers at POGOs, ngunit mariing itinanggi ng Bise Presidente na may personal siyang relasyon kay Madriaga o anumang koneksyon sa kanyang kaso.
“I do not have a personal relationship with Ramil Madriaga, nor have I ever given him instructions of any kind. I have never visited him in prison, nor have I spoken to him about anything at any time,” ani Duterte. Santi Celario
