MANILA, Philippines – Walang confidential funds sa proposed 2027 budget ng Office of the Vice President, ayon kay House Committee on Appropriations Vice Chairperson Representative Jose Alvarez nitong Miyerkules, Setyembre 2.
“Wala. Nothing, nothing. So it is up to the president kung bigyan niya ng [if he will give] confidential funds yung Office of the Vice President. That is his discretion,” sinabi ni Alvarez sa panayam matapos ang deliberasyon ng komite kung saan humiling ang OVP ng P785 milyong badyet para sa susunod na taon.
Ani Alvarez, walang request mula sa OVP para sa confidential funds.
Kasalukuyang tinatalakay sa impeachment ni Vice President Sara Duterte ang paggamit ng confidential funds na inilaan sa OVP at Department of Education nang kalihim pa ito ng ahensya.
Nag-isyu ang Commission on Audit ng notices of disallowance para sa confidential funds ng OVP noong 2022 at 2023.
Mula noon ay hindi na binigyan ang OVP ng anumang confidential fund.
Samantala, sa deliberasyon ng House Committee on Appropriations sa proposed budget ng OVP nitong Miyerkules, nagmosyon si BH Party-list Representative Robert Naza ng parliamentary courtesy sa OVP o pag-apruba sa budget proposals nang wala nang diskusyon na karaniwang ginagawa sa Pangulo at Bise Presidente.
“Yesterday, this committee extended to the Office of the President a long-standing courtesy, passing its budget without interpellation in recognition of its standing as co-equal branch of government. Today, I respectfully ask the same courtesy to the Office of the Vice President,” ani Nazal.
“The vice president is currently facing the weight of an impeachment proceeding, a burden already heavy enough on its own. Her budget, moreover, has not grown. It remains modest and unremarkable,” dagdag pa.
Tumutol naman ang ilang miyembro ng komite sa naturang mosyon kabilang sina House Deputy Minority Leader at ACT Teachers Party-list Representative Antonio Tinio.
“Nilinaw natin kahapon sa ating paliwanag na dapat ibasura na itong inter-parliamentary courtesy, lalo na pag usapin ng budget dahil nga tungkulin natin, ng lahat ng nasa gobyerno, ay maging transparent kung paano ginagamit ang pondo ng taumbayan,” paliwanag ni Tinio.
“Anong susunod dito? Another co-equal branch is the judiciary. Magmo-move na rin ba kayo na hindi na rin natin bubulatlatin o bubusisiin ang budget ng judiciary? Hindi naman yon nangyayari ever,” dagdag niya.
Nanawagan din siya na tapusin na ang ganitong tradisyon.
“Kailangang itigil na po natin ang practice na ito. Anyway, I am sure handa naman na sagutin ng Office of the Vice President anumang tanong kaugnay sa kanilang budget ngayon,” giit ni Tinio.
Sa pagtatanong ni Alvarez, pumayag si Nazal na isantabi muna ang kanyang mosyon.
Ito ay matapos na pumayag naman si OVP Chief of Staff Zuleika Lopez na sagutin ang mga tanong.
Ani Alvarez, sumulat ang OVP sa komite dalawang araw ang nakalilipas para abisuhan ang mga ito na si Lopez ang magrerepresenta sa opisina sa budget deliberations.
Ipinaliwanag ni Alvarez na karaniwang ang pinuno ng ahensya ang nagdedepensa sa budget proposal ngunit ang opisyal na may ranggong undersecretary ay pinapayagan din para magrepresenta sa ahensya. RNT/JGC
