MANILA, Philippines – Sinabi ng Department of Social Welfare and Development (DSWD) na ang Walang Gutom Program (WGP) ay isang pangmatagalang pamumuhunan sa human capital at hindi isang short-term relief measure o ‘ayuda’.
“We, in the Department, believe that it is high time we invest just as aggressively in human capital. What I am trying to say is that we will not progress as a nation if a significant portion of our population remains poor, marginalized, and underprivileged,” sinabi ni Asst. Secretary Baldr Bringas ng DSWD’s Innovations and Program Development Group (IPDG) nitong Miyerkules, Agosto 20 sa pilot episode ng reformatted DSWD Fastbreak.
Ipinunto ni Asst. Secretary Bringas na ang WGP ay bahagi ng pagsisikap ng gobyerno na tugunan ang hindi sinasadyang gutom at malnutrisyon habang binibigyang kapangyarihan ang mga pamilyang Pilipino.
“Dito po pumapasok ang WGP hindi bilang pansamantalang panukala kundi bilang isang strategic investment sa human capital,” sabi ng IPDG assistant secretary.
Ayon sa DSWD ang isa sa mga layunin ng WGP ay itaguyod ang nutrisyon at pagbabago sa pag-uugali sa mga benepisyaryo sa pamamagitan ng pagtulong sa kanila na maunawaan ang halaga ng pagbili at pagkain ng masustansyang pagkain sa pamamagitan ng mga sesyon ng edukasyon sa nutrisyon.
Ang pagdalo sa buwanang mga sesyon ng edukasyon sa nutrisyon ay isa sa mga kondisyon para sa mga benepisyaryo ng WGP para regular nilang matanggap ang kanilang buwanang kredito sa pagkain.
“I want to emphasize na itong programa na ito ay hindi isang ayuda program dahil tayo po ay nag-iimpose ng conditions. Ang isa sa mga kondisyon na ito ay yung tinatawag nating nutrition education session. Dito po ay tinuturuan natin ang mga benepisyaryo natin kung paano kumain nang tama, kaya nilang magprepare ng healthy, delicious, at affordable na food,” dagdag pa ni Bringas sa DSWD Fastbreak.
Sa ilalim ng programa, ang mga benepisyaryo ay binibigyan ng electronic benefit transfer (EBT) cards na puno ng P3,000 na halaga ng food credits bawat buwan na hindi napalitan ng pera.
Ang reformatted DSWD Fast Break ay pinangungunahan ni Information Officer Anne Lorraine Bustamante ng Strategic Communications’ Digital Media Service (DMS) at ipinapalabas tuwing Miyerkules ng 11 ng umaga, gamit ang Facebook platform ng DSWD. Santi Celario
