“MASARAP” din talagang maging opisyal ng gobyerno, mga kabayan, lalo pa nga at ikaw ay mapupwesto sa isang ‘juicy position’ kung saan marami ang gustong “sumipsip” sa hanay ng iyong mga tauhan upang mabigyan mo rin sila ng “pabor” na siya naman nilang inaasahan.
Ito ang sitwasyon sa isang kritikal na ahensya ngayon kung saan aabot (daw) sa higit P30 milyon, Department of the Interior and Local Government Secretary Jonvic Remulla, ang tatanggapin na ‘welcome cash gift’ ng isang opisyal na inaasahang mapupwesto na bago matapos ang buwan ng Hunyo.
Anang mga miron, hindi kataka-taka ang nasabing halaga. Dangan kasi, mistula umanong may “kumpetisyon” ang kanyang bagong ‘subordinates’ kung “sino” ang makapagbibigay ng mas malaking ‘cash gift’ sa kanya!
Anila pa, “payat” ang apat hanggang limang milyon na handang “ihatag” sa kanya ng mga gustong “sumipsip” pag tapak niya sa bago niyang opisina. Sa laki at lawak naman ng “tabakuhan” na sasakop sa isang rehiyon, DILG Usec. Dodo Dulay, magkano ‘yan? hehehe!
Kung sa ibang ‘LEAs’ (law enforcement agencies), ‘headline grabbing accomplishments’ ang pasalubong sa bagong “Boss Chief” para “bumango” sa publiko, sa ahensiyang ito yata, wala nang paligoy-ligoy pa, “pera-pera” na lang ang usapan? Ganun ba ‘yun?
Reyalidad na rin sa gobyerno na kapag bago ang pinuno, mayroong mapapalitan para naman “mapagbigyan” ang iba nilang kasamahan na malapit sa bagong pamunuan.
Kaya ‘yung mga “matitinik” gumawa ng sariling ‘fund-raising drive’ para naman “pabaon” sa pag-alis nila sa pwesto.
Kumbaga, ‘ma-floating’ man sila o malipat sa puwestong hindi kasing ‘lucrative’ ng inalisan nilang posisyon, aba’y ‘boundary’ na, oh, ‘di ba? At ‘yung isa sa kanila, may “naisubi” na agad umanong P2.5 milyon para sa sarili niya?
Ang “masakit” sa lahat ng ito Executive Secretary Lucas Bersamin, ang palaging “gatasang baka” ng mga ganitong tulisan sa loob ng gobyerno ay ‘yun mismong mga tao na dapat nilang protektahan at bantayan.
Kailan kaya, Department of Justice Secretary Boying Remulla, matitigil ang ganitong kalakaran?
Abangan!
