MANILA, Philippines – Tinukoy si Leyte Rep. Martin Romualdez bilang proponent ng P27 bilyong halaga ng proyekto sa ilalim ng Department of Public Works and Highways (DPWH) sa utos ng yumaong si Undersecretary Catalina Cabral, ayon sa prosecution witness nitong Lunes, Nobyembre 9.
Ang testimonyang ito ni Engineer Peter Paul Cortez, hepe ng DPWH Programming Division, ay kasabay ng bail hearing ni Romualdez na nahaharap sa P7.4 bilyong plunder case kasama si Zaldy Co, personal assistant ni Romualdez na si Joselyn Tragua Sereño, at Felicito Cristobal Guevarra, presidente ng Samchan Foreign Exchange Corporation.
Ani Cortez, nag-assume ang dibisyon na si Romualdez ang proponent ng P27 bilyon dahil ibinigay ni Cabral ang pangalan nito na ma-encode sa database ng DPWH.
Matatandaan na namatay si Cabral noong Disyembre 2025 matapos mahulog sa bangin sa Benguet.
Nang tanungin ni Sandiganbayan Third Division Chairperson Justice Karl Miranda kung bakit niya natukoy si Romualdez bilang project proponent sa kanyang judicial affidavit, sumagot si Cortez at sinabing “Per record of our database, they are the ones tagged as proponents. Actually, our term there is inserted.”
Ang P27 bilyong halaga ng mga proyekto ay hindi ipinanukala ng DPWH sa ilalim ng National Expenditure Program ngunit bahagi ng congressional amendments na ginawa sa General Appropriations Act.
Ani Cortez, ang kanyang “best guess” ay ang amendments ay ginawa sa bicameral conference committee deliberations, kung saan pinagtutugma ng panel ang mga bersyon ng Kamara at Senado sa proposed budget.
Sa cross examination naman ng counsel ni Romualdez na si Atty. Felix Villa, sinabi ni Cortez na hindi niya nakausap ang mambabatas o ang staff nito kaugnay sa mga proyekto.
Hindi rin umano naidokumento ang utos ni Cabral at hindi nakalagay sa database ng DPWH ang komisyon.
Paulit-ulit namang itinatanggi ni Romualdez ang pagkakaugnay nito sa kickback scheme sa flood control projects. RNT/JGC
