PATULOY ang imbestigasyon ng ‘Quadcomm’ ng Kongreso sa isyu ng Philippine Offshore Gaming Operators o POGO at mga “kapatid” nitong krimen katulad ng ‘drug smuggling,’ ‘human trafficking,’ ‘money laundering,’ ‘cybercrimes,’ at ‘human rights violations.’ Ang lahat na ito ay nakapaloob sa ‘2024 UNODC Report’ kung saan ‘starring role’ ang Pilipinas.
Malaking bagay na “nadakma” noong Huwebes sa Ninoy Aquino International Airport nang pinagsanib na pwersa ng Presidential Anti-Organized Crime Commission at Bureau of Immigration ang kapatid ni ex-President Rodrigo Duterte consultant, Michael Yang, habang palabas ng bansa.
Sa mga ulat, si Antonio Yang/Yang Jian Xin, kuya ni Michael, ang may-ari ng Empire 999 Realty na sabit sa drug smuggling at maraming transaksyon kay Bamban, Tarlac POGO protector and ‘front lady,’ ex-mayor, Alice Guo.
Aabot umano sa higit P3 bilyon ang isang transaksyon ni Guo at Empire 999. “Kinita” ba sa POGO o “bayaran” sa ‘drug deal,’ Quadcomm chair, Cong. Robert Ace Barbers?
Marami pang ‘front companies’ itong si Michael Yang at para hindi makalimutan, banggitin na natin itong ‘Xionwei Technology’ ni Yang na isa ring POGO operator at lisensyado ng Philippine Amusement and Gaming Corporation.
Matapos “uminit” sa ‘Pharmally Scam’ na “tinalupan” ni Sen. Dick Gordon bago ang 2022 elections, ‘nag-cash out’ sa Xionwei si Yang nang “matumbok” ni Sen. Dick ang kanyang sentrong papel sa Pharmally Scam at “ipinagkatiwala ang kontrol” sa Xionwei sa isang ‘Richard Lim.’
Take note: “Ipinagkatiwala” ni Yang kay ‘RL’ ang “kontrol,” Cong. Ace, hindi ang ‘ownership’ ng kompanya na sabit din sa Kidnap for Ransom ng mga Chinese.
Mainam maipatawag din ni Rep. Ace itong si Lim. Abangan!
