MANILA, Philippines – Itinutulak ni Parañaque 2nd District Rep. Brian Yamsuan ang pagpapalakas at modernisasyon ng arts education sa junior at senior high school upang mas maihanda ang mga kabataang Pilipino para sa lumalaking creative industry.
Sa ilalim ng House Bill No. 7864, palalawakin ang Special Program for the Creative Arts (SPCA) ng Department of Education upang maisama ang architecture and allied arts, cinema, design, digital fabrication at new media.
Mananatili rin sa programa ang creative writing, visual arts, media arts, music, dance at theater arts.
Ayon kay Yamsuan, mahalagang maagang malinang ang talento ng mga kabataan upang makabuo ng mas maraming skilled at industry-ready Filipino creatives na kayang makipagsabayan sa international market.
“Strengthening arts education in our secondary schools will harness their potential and help us build a sustainable pipeline of skilled and industry-ready creatives who can compete globally while telling distinctly Filipino stories,” ani Yamsuan.
Batay sa datos ng Philippine Statistics Authority, umabot sa P2.12 trilyon ang creative economy ng bansa noong 2025, katumbas ng 7.6% ng gross domestic product sa current prices. Nasa 8.71 milyon naman ang nagtatrabaho sa creative industries.
Umabot din sa humigit-kumulang P747 bilyon ang pinagsamang exports ng creative goods at services noong 2025.
Bukod sa arts curriculum, isasama rin sa panukala ang financial literacy, entrepreneurship at basic knowledge tungkol sa intellectual property rights.
Iminumungkahi rin ang pagbuo ng SPCA Council na mag-uugnay sa mga paaralan at creative industries para sa mentorships, work immersions, scholarships at job opportunities.
Kasama sa konseho ang mga kinatawan ng DepEd, National Commission for Culture and the Arts, Department of Trade and Industry, Cultural Center of the Philippines, Commission on Higher Education, Philippine Creative Industries Development Council at Creative Economy Council of the Philippines.
Pinapayagan din sa panukala ang pagkuha ng special instructors at industry experts at hinihikayat ang partnerships sa private sector para sa training ng mga mag-aaral.
May probisyon din para sa tax exemptions sa ilang donations at grants sa SPCA, gayundin sa pag-import ng creative industry equipment at materials na hindi available mula sa local manufacturers.
Kasalukuyang pending ang HB 7864 sa House Committee on Basic Education and Culture. RNT
