₱686.8M tobats nasabat sa Angeles; 2 bigtime tulak arestado

MANILA, Philippines – Nasabat ng Philippine Drug Enforcement Agency (PDEA) ang tinatayang ₱686.8 milyon halaga ng shabu sa isang buy-bust operation sa Brgy. Sto. Domingo, Angeles City, Pampanga noong Mayo 14, 2025.

Arestado sina alyas “Wang,” 31, isang Chinese national na naninirahan sa Clark, at alyas “Shania,” 24, na mula sa Tarlac City. Nahuli sila sa isang entrapment operation bandang 11:35 ng umaga sa Friendship Highway.

Nakuha mula sa kanila ang 101 kilo ng hinihinalang shabu na nasa 96 tea bags at 5 plastic packs, isang Toyota Sienna, cellphone, at mga lisensya.

Kakasuhan sila ng paglabag sa RA 9165 (Sections 5 at 11). Ayon kay PDEA Chief Usec. Nerez, kabilang ang dalawa sa mga pangunahing supplier ng ilegal na droga sa bansa, at ang operasyon ay bahagi ng direktiba ni Pangulong Marcos Jr. laban sa malalaking sindikato ng droga. RNT