MANILA, Philippines – Target ng Bureau of Corrections (BuCor) na ilipat ang humigit-kumulang 10,000 persons deprived of liberty (PDLs) mula sa New Bilibid Prison sa Muntinlupa City patungong Nueva Ecija upang maibsan ang siksikan sa pasilidad, ayon kay Director General Gregorio Catapang Jr..
Sa panayam, sinabi ni Catapang na halos kalahati ng 22,000 bilanggo sa Muntinlupa ang ililipat sa lupang nakuha ng pamahalaan sa Nueva Ecija, kung saan naglaan ang pamahalaang panlalawigan ng 60 ektarya.
“Out of the 22,000 inmates in Muntinlupa, we will be transferring 10,000 to decongest it… the provincial government gave us 60 hectares for PDLs in Luzon,” ayon kay Catapang.
Dagdag niya, maaaring ilagak sa isang super maximum security facility sa Sablayan, Occidental Mindoro ang mga high-profile convict na sangkot sa ghost flood control project cases. Inaasahang matatapos ang pasilidad sa loob ng taon.
Mayroon itong “justice hall” para sa virtual hearings at mahigpit na babantayan ang mga bilanggo, na hanggang dalawa lamang ang maaaring ilagay sa bawat selda.
“They are simply confined in their quarters… they can be given jobs or livelihood or reformation programs… ultimately reintegration back to society,” ayon kay Catapang.
Tiniyak din niya na walang makatatanggap ng espesyal na trato sa mga pasilidad.
“We want to make sure what happened in the previous administration will not happen again. It would be shameful if they do not get punished,” aniya. Dave Baluyot
