MANILA, Philippines – Sumailalim sa inquest proceedings para sa kasong murder ang 14-anyos na batang lalaki na umano’y nakapatay sa kanyang 13-anyos na kaklase sa loob ng Las Piñas National High School, ayon sa National Capital Region Police Office (NCRPO).
Ayon kay NCRPO spokesperson Maj. Hazel Asilo, nasa Bahay Pag-asa ang suspek at pansamantalang nasa kustodiya roon.
“As of now, he’s at the Bahay Pag-asa. He’s in temporary custody there,” aniya.
“He underwent inquest proceedings last Saturday for a murder case… That was the recommendation of the fiscal,” dagdag pa niya.
Ayon sa Juvenile Justice and Welfare Act, ang mga batang wala pang 15 taong gulang ay hindi mananagot sa kasong kriminal. Ngunit sa ilalim ng RA No. 10630, ang mga batang edad 12 hanggang 15 na gumawa ng malubhang krimen tulad ng murder ay itinuturing na “neglected” at inilalagay sa isang intensive juvenile intervention and support center.
Nangyari ang insidente noong Biyernes sa loob ng paaralan habang break time. Ayon sa pulisya, inutusan umano ng suspek ang biktima na bumili ng isang bote ng tubig. Nang bumalik ito, hiningi ng suspek ang sukli. Sinabi ng biktima na naiwan ang P10 na sukli sa canteen, na naging dahilan ng kanilang pagtatalo hanggang sa umano’y saksakin siya ng suspek gamit ang pocket knife.
“The suspect asked the victim to buy him a bottle of water. When he came back, the suspect asked him for the change. The victim said he had left the P10 change back at the canteen. That’s where their argument began until it escalated into the suspect stabbing the victim,” aniya.
“The CICL only bought the pocket knife online… It’s possible the knife was on his body and not in his bag, so it wasn’t searched when he entered the school,” dagdag niya. RNT/MDS
