MANILA, Philippines – IPINAHAYAG ng Bureau of Immigration (BI) na nagbalik-bansa na ang 17 Pilipino na biktima ng human trafficking na ipina-deport mula sa bansang Malaysia at dumating sa Zamboanga City noong Oktubre 25, sakay ng MV Antonia.
Nabatid sa BI na kabilang sa grupo ang isang pamilyang may apat na miyembro—isang ama, ina, at dalawang anak na lalaki—na nirekrut noong 2023 at umalis ng bansa sa pamamagitan ng isang ilegal na migrasyon, na karaniwang kilala bilang ruta ng “backdoor,” mula sa Jolo, Sulu, gamit ang speedboat.
Ayon sa ulat ng BI, ang ama ay pinangakuan ng trabaho bilang isang magsasaka sa plantasyon ng isang kumpanya ng palm oil sa Malaysia na may suweldong 2,000 Malaysian Ringgit bawat buwan. Sumunod ang kanyang pamilya ngunit humingi ng tulong makalipas ang dalawang taon matapos makaranas ng pang-aabuso mula sa kanilang amo.
Isa pang pangkat ng anim na deportado ang nagbahagi ng mga katulad na kuwento, na nagbunyag na bawat isa sa kanila ay nagbayad ng 1,700 Malaysian Ringgit para sa ilegal na pagtawid sa hangganan.
Pagdating sa Malaysia, naiulat na tumalon sila sa dagat malapit sa daungan upang maiwasan ang paghuli ng mga lokal na awtoridad bago sila naging mga undocumented worker sa parehong plantasyon na pagmamay-ari ng isang Chinese national.
Dalawa pang batch, isa na binubuo ng tatlong indibidwal at isa pa ng apat, ay pumasok din sa Malaysia sa pamamagitan ng parehong iregular na ruta noong 2022, 2023, at 2024. Parehong grupo ay ikinulong ng limang buwan bago ang deportasyon.
Kinondena naman ni BI Commissioner Joel Anthony Viado ang patuloy na pagsasamantala sa southern maritime route ng mga human trafficker at binigyang-diin ang pangangailangang palakasin ang seguridad sa mga nabanggit na lugar.
“The backdoor remains a dangerous corridor for illegal migration and human trafficking,” ani Viado. “We call for stronger coordination among law enforcement agencies, local government units, and communities in the region to tighten security and prevent further abuse of our kababayan.”
Pinasalamatan din ng BI ang Inter-Agency Council Against Trafficking (IACAT) para sa patuloy nitong pagsisikap sa pagtukoy ng mga kritikal na lugar na nangangailangan ng mas maraming presensya sa seguridad at kooperasyon sa pagitan ng mga ahensya.
Ang mga ipina-deport na pamilya ay nasa ilalim na ngayon ng pangangalaga ng Department of Social Welfare and Development (DSWD) at iba pang mga ahensyang katuwang para sa tulong at debriefing sa kanila. JAY Reyes
