MANILA, Philippines – Nagpadala ang Police Regional Office sa Central Luzon (PRO3) ng nasa 2,100 uniformed personnel sa National Capital Region Police Office (NCRPO) para sumuporta sa pagpapanatili ng seguridad sa Trillion March 2.0 anti-corruption protest activities ngayong Linggo, Nobyembre 30.
Ang send-off ceremony ay ginanap sa Camp Captain Julian Olivas sa City of San Fernando, Pampanga, kung saan isinagawa ang “blessing of the troops” na pinangunahan ni Catholic priest Lieutenant Colonel Jonathan Chy, regional pastoral officer.
Ipinanalangin ni Chy ang nasa 2,100 pulis “for their protection, strength, and discernment as they perform their duties in Metro Manila.”
Ang contingent ay nagmula sa Regional Mobile Force, maneuver units at provincial offices.
Sa pahayag ni Brigadier General Ponce Rogelio Peñones Jr., PRO3 regional director, sinabi nito na ang augmentation personnel “were carefully selected and thoroughly briefed to uphold maximum tolerance, discipline, and professionalism throughout the duration of the mass action.”
Pinaalalahanan naman ang mga ipinadalang pulis na panatilihin ang operational protocols, respeto sa human rights, at pananatiling mapagmasid sa lahat ng panahon.
Siniguro rin ng police regional director na kaya pa rin ng PRO 3 na panatilihin ang kapayapaan at kaligtasan sa Central Luzon sa kabila ng deployment ng nasa 2,100 pulis sa Metro Manila.
“Regular police visibility, crime prevention operations, and emergency response capacities within the region will remain uninterrupted,” aniya.
“We reminded our troops to observe maximum tolerance, respect the rights of all demonstrators, and stay guided by the standards of our service. Our role is clear—to help maintain peace and order and safeguard the community,” dagdag pa nito. RNT/JGC
