MANILA, Philippines – Pinatay ang dalawang lalaki sa Bacolod City nitong Huwebes, Setyembre 12.
Kinilala ng pulisya ang mga biktima na sina Reman Quiñanola, 31 anyos ng Barangay Bantayan, Kabankalan City, Negros Occidental, at Mark, 39, ng Barangay Bata, ng nabanggit na lungsod.
Nadiskubre si Quiñanola na may mga sugat sa ulo, sa tubuhan sa Hacienda Gensoli, Barangay Vista Alegre na agad dinala sa pinakamalapit na ospital ngunit idineklarang patay.
Ayon kay Police Capt. Dax Santillan, hepe ng Police Station 7, isinasagawa na ang follow-up investigation at naghihintay na rin sila ng go-signal mula sa pamilya ng biktima para isagawa ang autopsy at malaman ang sanhi ng kamatayan nito.
Samantala, binaril patay naman si Mark sa Purok Pepsi Zone 1, Barangay Bata.
Nakaupo ang biktima sa tricycle nang dumating ang hindi pa tukoy na indibidwal at binaril ito sa ulo.
Dead on the spot si Mark habang nakatakas naman ang suspek na sakay ng scooter.
Iniimbestigahan na rin ng pulisya ang insidente kung ito ba ay may kaugnayan sa illegal na droga matapos marekober sa bulsa ng biktima ang empty sachets ng illegal na droga. RNT/JGC
