MANILA, Philippines – Target ng House of Representatives na maaprubahan ang dalawang priority measures ng Legislative-Executive Development Advisory Council (LEDAC) sa muling pagbubukas ng sesyon sa Lunes, Mayo 4, ayon kay House Majority Leader at Ilocos Norte Representative Sandro Marcos.
Ang panukala ay ang National Land Use Act at ang mga pag-amyenda sa Pantawid Pamilyang Pilipino Program (4Ps) Act.
Ipinaliwanag ni Marcos na layon ng National Land Use Act na magbigay ng panuntunan para sa land use planning sa bansa, haba ang amyenda sa 4Ps ay naglalayong palakasin at palawakin ang flagship social protection program ng pamahalaan.
“These are not theoretical proposals anymore. These are measures that have already moved through key stages, and what they need now is sustained floor work so we can bring them across the finish line before adjournment,” ani Marcos.
Sa kasalukuyan, 18 sa kabuuang 52 priority measures na naipasa ng Kamara, kabilang ang EPIRA Amendments para sa pagpapalakas ng ERC, Waste-to-Energy, mga amyenda sa Government Assistance to Students and Teachers in Private Education Act, Assistance to Individuals in Crisis Situations Act, mga pagbabago sa National Building Code, Blue Economy Act, National Reintegration Bill, at mga amyenda sa Teachers Professionalization Act.
Kasama rin sa listahang ito ang Extension of Estate Tax Amnesty Period, Department of Water Resources Bill, Amendments to the Bank Deposits Secrecy Law, Travel Tax Abolition, Digital Payments Act, mga amyenda sa Universal Access to Quality Tertiary Education Act, Presidential Merit Scholarship Program, mga pagbabago sa Biofuels Act, ang pag-reset ng unang regular na halalan sa Bangsamoro Autonomous Region in Muslim Mindanao, at ang pagtatatag ng National Center for Geriatric Health.
“A total of 18 priority measures already passed before the Holy Week break. Masigasig po ang inyong Kamara sa ilalim ng pamumuno ni Hpuse Speaker Dy sa pagpasa ng mga prayoridad na panukala ng administrasyon. And so far, we are proud of what we have accomplished,” dagdag pa ni Marcos.
Nauna nang nangako si House Speaker Faustino Dy III na bibigyang-prayoridad ang mga panukalang batas na magpoprotekta sa publiko laban sa epekto ng nagtataasang presyo ng langis bunsod ng tensyon sa Middle East. Gail Mendoza
