Arestado ang dalawang drug suspects sa ikinasang buy-bust operation ng mga tauhan ng Parañaque City police Station Drug Enforcement Unit (SDEU) bago managhali ng Linggo, Agosto 11.
Sa report na natanggap ni Southern Police District (SPD) director P/Brig. Gen. Leon Victor Rosete na galing sa Parañaque City police ay kinilala ang mga nadakip na suspects na sina alyas Marvin, 28, na tinaguriang high value individual (HVI), at isang alyas Eduard, 20.
Ayon kay Rosete, nadakip ang mga suspects sa matagumpay na pagsasagawa ng buy-bust operation bandang alas 11:40 ng umaga sa Barangay San Dionisio, Parañaque City.
Sa isinagawang buy-bust operation ay narekober sa posesyon ng mga suspects ang 150 gramo ng hinihinalang shabu na nagkakahalaga ng P1,020,000, kulay itim na sling bag, kulay berdeng coin purse at ang P500 buy-bust money na ginamit sa naturang operasyon.
Ang mga nakumpiskang ebidensya na gagamitin bilang ebidensya sa pagsasampa ng kaso laban sa mga suspects ay sinala sa SPD Forensic Unit para sumailalim sa chemical analysis.
Kasalukuyang nakapiit sa custodial facility ng Paranaque City police ang mga suspects na nahaharap sa kasong paglabag sa Republic Act 9165 (Comprehensive Dangerous Drugs Act of 2002). (James I. Catapusan)
