MANILA, Philippines- Natagpuang abandonado ang dalawang sasakyang iniuugnay sa multi-billion peso drug haul sa Alitagtag, Batangas, sa San Luis, Pampanga, noong April 21, ayon sa Philippine National Police (PNP).
Sinabi ni PNP Spokesperson Col. Jean Fajardo na nakatulong ang imbestigasyon ng Calabarzon police at backtracking ng CCTV footage upang marekober ang itim na sports utility vehicle sa isang sementeryo at ang puting sasakyan sa parking lot ng isang sabungan.
“Base sa imbistagsyon ng PNP Calabarzon, kasama na yung backtracking ng mga CCTV footages itong dalawang sasakyan po ay nakitang kasama noong Foton van na minamaneho ng suspect kung saan nakuha sa possession nya 1.4 tons of illegal drugs,” pahayag ni Fajardo sa isang press briefing.
Ani Fajardo, narekober ang mga sasakyang may ibang plaka subalit natagpuan ang aktuwal na license plates sa CCTV footage.
Bukod dito, sinabi ni Fajardo na natuklasan din ng mga awtoridad ang Official Receipt/Certificate of Registration ng dalawang SUVs.
Kasalukuyang nasa kustodiya ng Highway Patrol Group – Calabarzon ang mga sasakyan.
Isasailalim ang mga ito sa forensic examination, macro-etching, o verification procedure kung saan gumagamit ng paint remover upang suriin kung hindi binago ang mga numero.
Inihayag din ni Fajardo na nakapanayam na ng mga imbestigador ang ilang saksi mula sa San Luis subalit hindi inilahad ang pagkakakilanlan ng mga ito.
Aniya, itinuro umano ng mga saksi ang isang “logbook” na nagkukumpirmang magkakasamang bumiyahe ang mga sasakyan.
Nang tanungin ukol sa pagkakakilanlan at paglalarawan ng mga driver ng mga sasakyan, hindi isiniwalat ni Fajardo ang anumang detalye ukol sa kanila subalit tiniyak sa publiko na may hawak silang “good leads.”
Bukod sa mga sasakyan, nauna nang inihayag ni Interior and Local Government Secretary Benhur Abalos na nadiskubre ng mga awtoridad ang isang yate na iniuugnay sa P9.68 billion shabu haul.
Natuklasan ang mga droga sa loob ng isang van patungong Parañaque City. Pinatigil ng mga awtoridad ang driver nito na kinilalang si Alajon Michael Zarate, habang patungo sa Lipa City. RNT/SA
