P4.4M ecstasy, heroin nasabat sa parcel

MANILA, Philippines – Nakumpiska ng Bureau of Customs (BOC) ang anim na parcel na naglalaman ng ecstasy at heroin na may halagang P4.43 milyon sa Ninoy Aquino International Airport (NAIA).

Ang mga kargamento, na naharang sa Central Mail Exchange Center, ay naglalaman ng 1,330 tableta ng ecstasy at 362 gramo ng heroin, na nakatago sa mga package na may label na skincare products at plumbing materials.

Ang mga droga ay galing sa Ireland, Netherlands, at Thailand.

Nakipag-ugnayan ang BOC sa Philippine Drug Enforcement Agency (PDEA) at NAIA Inter-Agency Drug Interdiction Task Group para sa operasyon.

Binanggit ni Customs Commissioner Bienvenido Rubio ang kahalagahan ng pagbabahagi ng impormasyon, kooperasyon ng mga ahensya, at mahigpit na pagsisiyasat.

Ang mga droga ay ibinigay na sa PDEA para sa imbestigasyon at kaukulang aksyon ayon sa batas. RNT